Rheoliadau Gwasanaethau Iechyd (Y Gyfundrefn Dethol Darparwyr) (Cymru) 2025

Dyfarnu contract sy’n seiliedig ar gytundeb fframwaith gyda chystadleuaeth

20.—(1) Mae’r rheoliad hwn yn gymwys pan fo awdurdod perthnasol yn penderfynu dyfarnu contract sy’n seiliedig ar gytundeb fframwaith gyda chystadleuaeth.

(2) Rhaid i’r awdurdod perthnasol—

(a)dilyn y camau yn y rheoliad hwn, a

(b)dyfarnu unrhyw gontract gyda chystadleuaeth.

Cam 1

(3) Rhaid i’r awdurdod perthnasol benderfynu ar feini prawf dyfarnu’r contract.

(4) Wrth benderfynu ar feini prawf dyfarnu’r contract, rhaid i’r awdurdod perthnasol ystyried y meini prawf allweddol.

Cam 2

(5) Rhaid i’r awdurdod perthnasol wahodd pob darparwr perthnasol sy’n barti i’r cytundeb fframwaith i gyflwyno cynnig i ddarparu’r gwasanaethau iechyd perthnasol.

(6) O dan baragraff (5), mae darparwr perthnasol yn ddarparwr y mae’n ofynnol i’r awdurdod perthnasol ei wahodd yn unol â’r cytundeb fframwaith.

(7) Rhaid i’r gwahoddiad y cyfeirir ato ym mharagraff (5) gynnwys yr wybodaeth a nodir yn Atodlen 16.

Cam 3

(8) Rhaid i’r awdurdod perthnasol asesu unrhyw gynigion a ddaw i law yn unol â meini prawf dyfarnu’r contract.

(9) Caniateir i awdurdod perthnasol asesu cynigion a ddaw i law o dan gam 3 fesul cam.

Cam 4

(10) Rhaid i’r awdurdod perthnasol wneud penderfyniad ynghylch y darparwr a ddewiswyd.

Cam 5

(11) Rhaid i’r awdurdod perthnasol hysbysu’n brydlon, yn ysgrifenedig—

(a)y darparwr llwyddiannus fod ei gynnig wedi bod yn llwyddiannus, a bod yr awdurdod perthnasol yn bwriadu dyfarnu contract;

(b)pob darparwr aflwyddiannus fod ei gynnig wedi bod yn aflwyddiannus, a rhaid i hysbysiad o’r fath gynnwys yr wybodaeth a nodir yn Atodlen 10.

Cam 6

(12) Rhaid i’r awdurdod perthnasol gyflwyno i’w gyhoeddi hysbysiad o fwriad i wneud dyfarniad i’r darparwr a ddewiswyd.

(13) Rhaid i’r hysbysiad y cyfeirir ato ym mharagraff (12) gynnwys yr wybodaeth a nodir yn Atodlen 11.

(14) Yn dilyn cyhoeddi’r hysbysiad ym mharagraff (12), mae’r cyfnod segur yn dechrau yn unol â rheoliad 12(4).

Cam 7

(15) Pan gyflwynir sylwadau ysgrifenedig yn unol â rheoliad 12(5), rhaid i’r awdurdod perthnasol—

(a)cydymffurfio â’r gofynion a bennir yn rheoliad 12(7) a (9), a

(b)hysbysu darparwyr posibl am y penderfyniad pellach a wneir o dan reoliad 12(10) ac unrhyw benderfyniadau dilynol pellach a wneir o dan reoliad 12(12), yn unol â rheoliad 12(11) a (13).

(16) Pan na chyflwynir unrhyw sylwadau ysgrifenedig yn unol â rheoliad 12(5), caniateir i’r awdurdod perthnasol symud o gam 6 i gam 8.

Cam 8

(17) Caniateir i’r awdurdod perthnasol ymrwymo i’r contract ar ôl i’r cyfnod segur ddod i ben yn unol â rheoliad 12(14) neu (15).

Cam 9

(18) Pan fo’r awdurdod perthnasol yn ymrwymo i gontract o dan gam 8, rhaid i’r awdurdod perthnasol gyflwyno i’w gyhoeddi hysbysiad am ddyfarnu’r contract o fewn 30 o ddiwrnodau i ddyfarnu’r contract.

(19) Rhaid i’r hysbysiad y cyfeirir ato ym mharagraff (18) gynnwys yr wybodaeth a nodir yn Atodlen 12.